Neujahrsvorsätz...

Es sind die Täg, churz vor Wiehnachte. Insgeheim hofft mer, dass das Jahr nie wird vergah, will mitemene neue Jahr, chemend au all die guete Vorsetz wommer doch setti ha. 

Im alte Jahr und bsunders zur Wiehnachtsziit ischmer entschuldigt, wemmer am Glüehwiistand anstatt im Fitnesszentrum staht. Es feins Guezli z’verneinen bringt jetzt au nüt meh, eis meh oder weniger, macht de „Brate“ au nümm feisser... alli wünschend sich denn im Chor, punkt um Mitternacht es frohs neus Jahr, mit vollem Elan und gueter Miine, fiirt mer i das neue Jahr ine. d‘Hoffnig uf das „unfassbare Jahr“ isch für e churzi Ziit no da.

Doch s‘böse Erwache am 1. Janur isch nah... denn wer das „unfassbare Jahr“ will ha, setti jetzt ufstah und is Fitnesszentrum gah, wer das „unfassbare Jahr“ will ha, sett jetzt siin Job endlich chünde oder lueger, dasser die neui Wohnig chan finde. Wer das „unfassbare Jahr“ will ha, set afange, sich langsam ide Gsellschaft en Name mache, denn e gueti Karriere lauft nönd vonelei, nei, sone Karriere brucht viel Fliis und oftmals, zahlt mer dadefür en höche Priis. Wer das „unfassbare Jahr“ will ha, set doch aumal no de Deckel zu sinnere Pfanne finde, schliesslich wot s’Grossmami bald emal no Urgrosschinde.

Irgendwenn werdend eim die Vorsätz doch chli zbunt... Plötzlich gseht mers denn mit all dene Neujahrsvorsätz au nüm so eng und mer merkt, dass das neue Jahr doch chli z‘schnell isch cho und mer sich mit sine Vorssätz chli het übernoh. Die alte Muster hend sich irgendwo dure guet bewehrt und rückblickend hani mi im alte Jahr vilicht doch chli zviel beschwert?!

Muess ich denn immer grad alles verändere oder bin ich irgendwo dure en typische schwiizer Bünzli wos nid gern het, wenn sich zviel dut ändere? Chans echt sii, dass vieles wo für mich so selbstverständlich isch, doch es riese grosses Gschenk a mich isch? Bin ich mir eigendlich bewusst, mit was füremene Überfluss ich leb?

Egal wie du i das Jahr wetsch starte, für mich isches underdesse klar, chli meh Dankbarkeit, das isch min und au de einzig Vorsatz für das neue Jahr.